Fagnaðarerindið um gjörvalla heimsbyggðina
Það er ósk Kúrbítsins að umferðin á síðu hans verði mun meiri á komandi dögum, vikum og mánuðum. Það er algjörlega óviðunandi ástand að það komi u.þ.b. 150.000 manns á Mbl.is á einni viku á meðan einungis komi 250 manns inn á síðu Kúrbítsins á þessu sama tímabili, þetta er niðurstaða sem Kúrbíturinn á erfitt með að sætta sig við. Hann hóf útgerð þessarar síðu með það að markmiði að skáka öllum helstu samkeppnisaðilunum á þessum markaði......verða stærstur, bestur og flottastur. Þetta er ekki alveg að ganga eftir en Kúrbíturinn er ekki búinn að leggja árar í bát....hann mun halda ótrauður áfram og berjast þar til yfir lýkur.

Kúrbíturinn þarf á hjálp, góðmennsku og atorku aðdáenda hans um allan heim að halda, sem aldrei fyrr. Það sem aðdáendur Kúrbítsins þurfa að gera er að fara oftar inn á síðuna og svo miklu oftar eftir það. Það þarf að bera út fagnaðarerindið til allra þeirra sem vilja kynnast leyndardómi kúrbítsins.....sem er jafnframt leyndardómurinn um hina eilífu hamingju. Það þarf síðan að láta alla núverandi og verðandi aðdáendur Kúrbítsins fara oftar og miklu oftar inn á þessa dásamlegu síðu....sem eins og áður sagði inniheldur leyndardóminn um eilífa hamingju öllum til handa.

Gerum heiminn að fallegri, skemmtilegri og hamingjusamari stað með því að bera út fagnaðarerindið um gjörvalla heimsbyggðina.

Stíflan brast með látum
Síðustu 24 klukkustundir hafa verið Kúrbítnum erfiðar....en að sama skapi þroskandi. Ritstíflan fór illa í Kúrbítinn, honum fannst hann vera fastur inn í eigin sál, sálin tútnaði út og var við það að springa. Kúrbíturinn þurfti svo mikið að tjá sig, hafði frá svo mörgu að segja en allt kom fyrir ekki.....hún var stór þessi stífla og sprakk með látum.

Kúrbíturinn hélt á tímabili að stíflan væri komin til að vera um ókomna tíð, skelfilegt er að hugsa þá hugsun til enda að vefheimurinn fengi ekki að njóta krafta Kúrbítsins. Kúrbíturinn er búinn að vera í strangri endurhæfingu þar sem allt hefur verið gert til þess að hann myndi ná sínum fyrri styrk sem allra fyrst.

Kúrbíturinn er nú kominn til baka sterkari, ferskari og fullur af væntumþykju sem hann ætlar sér að dreifa inn í hjörtu aðdáenda sinna um allan heim. Kúrbíturinn getur ekki lofað því að álíka stífla hindri flæðið frá sál hans aftur einhvern tíman í framtíðinni en allt mun vera gert til að koma í veg fyrir að það gerist ....... eins og segir í söngtextanum "enginn veit fyrr en ríður á bararararara.........".

Kúrbíturinn er kominn á skrið....sterkari sem aldrei fyrr.